高山茶反應

飲過靚的高山茶﹐令人回味無窮不在話下。但係初初飲靚茶之後﹐有一個幾得意的反應。飲咗靚的台灣高山茶﹐會放屁﹐個胃又會嗳啲氣出來﹐以為係個別現象﹐後來問過身邊的朋友﹐他們都有如此反應。原來呢啲叫做“上通下通”。是初初飲靚茶出現的身體調整現象。是要飲靚茶才有嘅現象。飲茶可以幫助通腸胃。如要身體健康﹐最緊要是三通﹐腸胃要通﹐氣血要通﹐精神心胸也要通。

普洱茶﹐香港人覺得是很平常的茶葉﹐在酒樓一定有得飲﹐冇乜特別﹐顏色黑過墨汁﹐甘甘地﹐苦苦地﹐主要是幫助消化﹐後生仔可能覺得普洱茶好老土﹐喺亞伯飲嘅茶葉﹐飲得多﹐棚牙都可能會染成黑色。一般人對普洱茶印象麻麻﹐係有原因嘅。以前香港啲廉價茶居﹐為咗慳皮﹐會將啲普洱茶﹐循環再用﹐收集茶壺沖過嘅茶渣﹐晒乾﹐再加上紅紅黑黑嘅色素﹐就變成翻新普洱茶﹐呢啲茶得個樣﹐有色而無味﹐或者大家以前都曾經飲過。

飲靚嘅遠年普洱茶就是另外一回事﹐有天淵之別﹐除咗會“上通下通”之外﹐仲會有一種陶醉嘅感覺﹐飄飄然﹐心境安逸而可忘憂﹐有舒服自在嘅感覺。素食者可能是食素嘅關係﹐身體感覺比較敏銳﹐對好的東西﹐特別容易感覺出來。

遠年普洱茶有呢啲特性﹐皆因喺存放越耐﹐普洱茶本身嘅粗糙物質﹐亦即粗糙嘅震動力就會按年減少﹐剩下微細嘅震動力﹐年份越久﹐震動力就變得越微細﹐越微細的能量就越令人舒服。越粗糙嘅能量就越會令人唔舒服﹐好似馬路邊啲噪音就是粗糙能量嘅最佳例子﹐聽後會令人唔舒服﹐反之﹐悅耳的聲音﹐如好聽嘅音樂﹐就是較好的能量﹐會令人心曠神怡。孔子都有講繞樑三日嘅故事﹐可想而知呢啲微細嘅震動力有幾厲害。

飲咗遠年普洱茶﹐我地可以暫時忘記身體嘅感覺﹐享受飄飄然而忘憂的境界。五十年嘅普洱已經非常好啦﹐好多人都未飲過﹐如果有超過百年普洱更不得了﹐但呢啲實在可遇不可求。