耕田－動物攪攪震 ﹐香港野豬 Vs 長白山黑熊

香港山多﹐很多人都喺上面種菜和生果。喺山上面種嘢﹐不時都會有啲動物嚟攪攪震。雀仔鐘意將種子當米咁啄﹐啲虫有一百幾十種咁多﹐有啲鐘意食菜葉﹐有啲鐘意用佢個針咀來啜汁液﹐有啲鐘意食嫩苗﹐老鼠最鐘意食瓜果﹐尤其是番茄﹐唔熟唔食。最厲害的係野豬﹐體形又大﹐又有獠牙﹐個嘴又成個垃圾鏟形咁尖出嚟﹐最鐘意食蕃薯 ﹐一聞到你塊田有蕃薯﹐夜晚就會嚟鏟起你成塊田﹐攞啲蕃薯食﹐破壞力非常強﹐啲野豬最惡係生咗豬仔嘅豬姆。

東北長白山黑熊嘅破壞力同香港野豬有得揮。當地的泥土是黑色﹐非常肥沃﹐因為有機物質多。長白山的黑熊有成個人咁高﹐佢地有時都鐘意食齋﹐好鐘意食粟米。長白山地區的村庄農田是以幾多十畝計算﹐喺香港有幾萬平方呎地種嘢已經好犀利﹐但係同長白山比真係冇得比。

黑熊摘粟米就比較笨﹐不過佢地玩人就唔笨﹐如果比佢捉住﹐最鐘意就用個屁股來坐住嗰個人﹐又用條脷舔你塊面。農民就最怕黑熊嚟粟米田摘粟米﹐啲黑熊會摘晒成田的粟米落嚟﹐但係最後都係攞一支粟米走。點解呢﹖

黑熊入到粟米田﹐摘咗一條後﹐就會用“隔叻底" （腋下）夾住。佢諗住有兩個隔叻底﹐每邊夾住一條就可以攞兩條粟米離開。點知﹐隻黑熊摘第二條粟米放落另外一邊隔叻底時﹐原先夾住嗰條已經跌咗落地﹐又唔識喺地下執番上嚟。如是者﹐摘來摘去﹐都是夾住一支﹐又跌另外一支﹐點樣都係唔夠數﹐最後﹐成田粟米摘晒落嚟通地都係﹐隻黑熊衹能攞一條粟米走。

反而長白山有其他食齋嘅野生動物﹐例如鹿等﹐就好少來光顧﹐因為周圍都有大把植物比佢地食。