| |
睇電視的粵語長片﹐經常會睇到﹐就是主角的爸爸病危﹐但係要等埋個主角返嚟﹐見最後一面。咁樣﹐劇情會安排老人家食一百幾十年的野山人參﹐吊住啖氣﹐頂住先﹐等個主角返嚟交埋啲家產比佢。呢啲情節﹐都是說明人參補氣。
人參名貴﹐尤其是野山人參﹐價錢比人工種的貴很多。人工種植的人參﹐好似種菜咁﹐落化肥﹐農藥﹐營養好﹐所以體形特別肥大。而野生人參﹐因自然環境因素﹐生長緩慢﹐所以外形纖瘦。人工種的人參與野生人參比較﹐就好像粵語長片的演員梁醒波和新馬仔咁﹐一肥一瘦﹐人工的肥﹐野生的瘦。
以前集體制的時候﹐喺長白山採野山參的方法﹐類似香港電視上警察找彈頭的地氈式搜索方法﹐就是一個領隊﹐帶領十幾個人﹐一字形排開﹐組成一條打橫的人鏈﹐由山下一路掃上山頂﹐一個一個山頭咁掃﹐咁樣搜法﹐野山參梗係越來越少喇。
另外以前在長白山種參﹐是不用化肥的。因為化肥要用錢買﹐農民慳得就慳﹐所以上山挖山上的泥土來種參﹐果啲泥含有豐富有機物質。有意無意間﹐造成一個類似野生環境的土壤﹐栽種出來的人參特別香﹐一打開個盒﹐香味充滿整間屋。
人參補氣﹐粵語長片都有講﹐有冇咁犀利就唔知。很多香港人都喜歡買人參來進補。不過人參是中藥﹐每個人的體質虛實寒熱不同﹐最好請教醫師﹐根據專家意見﹐先調理好身體﹐再進補。
如果一味補氣﹐就好似駕駛汽車踏油門加油﹐增加汽車動力。汽車情況良好﹐當然風馳電掣。但假如身體有地方唔妥﹐好似架車咁﹐車輪有事﹐呔盤又有問題﹐車身又散散地。一味加油踏油門﹐初初衝得好快﹐不過衝得兩衝﹐個車輪脫落﹐呔盤又扭唔到﹐後果可以想象。所以進補﹐一定要對症下藥﹐配合身體機能的情況。